Gunnhild Øyehaug har med «Her kjem sola» skrive ein morosam og på same tid alvorsprega roman om kjærleik og overgangsalder. Den 6. november gjestar ho Litteraturhuset i Trondheim for å fortelle om boka.

Den 49 år gamle forfattaren Helga Mork har slått seg til ro med å leve resten av livet aleine, men så forelskar ho seg i ein gift mann og verkelegheita blir (bokstaveleg talt) snudd på hovudet. Med «Her kjem sola» har Gunnhild Øyehaug skrive ein morosam, og på same tid alvorsprega, roman om å ikkje kjenne seg igjen i omverdas forventningar i det ein når ein viss alder. Boka rommar nydelege skildringar av forelskingas oppturar og nedturar – for ikkje å gløyme dei mindre flatterande kroppslege understraumane … Øyehaug har gjennom åra etablert seg med ein særeigen, finspissa skrivestil og i «Her kjem sola» kjem vi igjen i kontakt med dette «typisk øyehuagske» i foreininga av fantastisk historieforteljing og litterær teft.

Den 6. november gjestar Øyehaug Litteraturhuset i Trondheim i samtale med Anne Sigrid Refsum

Gunnhild Øyehaug er oppvaksen i Ørsta og busett i Bergen. Ho debuterte i 1998 med ei diktsamling, og har sidan skrive novellesamlingar, romanar og essaysamlingar. Øyehaug er omsett til fleire språk og blir skildra med store ord både i Noreg og i utlandet. I 2018 vart den amerikanske utgåva av romanen Vente, blinke nominert til National Book Award, ein av dei mest prestisjetunge litterære prisane i USA.

Anne Sigrid Refsum har PhD i nordisk litteraturvitenskap og er for tiden frittgående forsker og formidler om folk og fortellinger.